Серік Ақшолақов: Тәуелсіздіктің 35 жылында Қазақстан заманауи нейрохирургиялық қызметті қалыптастырды
Пятница, 5 Июнь 2026
Қарағанды қаласында өтіп жатқан Қазақстан нейрохирургтарының VI Конгресінің ашылуында Қазақ нейрохирургтар ассоциациясының президенті, «Ұлттық нейрохирургия орталығы» АҚ Басқарма төрағасы, ҚР ҰҒА академигі Серік Ақшолақов отандық нейрохирургияның Тәуелсіздік жылдарындағы жетістіктері туралы айтты.
Оның айтуынша, Конгрестің Қазақстан Республикасы Тәуелсіздігінің 35 жылдығы қарсаңында өтуі кәсіби қауымдастық үшін ерекше маңызға ие.
«Тәуелсіздіктің 35 жылы – бұл мемлекеттің ғана емес, сонымен қатар қазақстандық нейрохирургияның қалыптасуы мен дамуының тарихы. Осы уақыт ішінде сала мамандандырылған қызметті қалыптастырудан бастап жоғары технологиялық медициналық көмекті енгізуге және халықаралық деңгейге шығуға дейінгі үлкен жолдан өтті», – деді Серік Ақшолақов.
Қазақ нейрохирургтар ассоциациясының президенті Тәуелсіздік жылдары елімізде заманауи медициналық инфрақұрылым қалыптасып, мамандандырылған орталықтар ашылғанын және диагностика мен емдеудің озық технологиялары енгізілгенін атап өтті.
Ол бұл жетістіктердің жарқын мысалы ретінде 18 жыл бұрын Астанада ашылған Ұлттық нейрохирургия орталығын атады.
«Бүгінде Ұлттық нейрохирургия орталығы әлемге жоғары технологиялар, ғылыми зерттеулер мен білікті мамандар даярлайтын жетекші орталық ретінде танымал», – деді Серік Ақшолақов.
Серік Ақшолақов отандық нейрохирургияның даму деңгейі Қазақстанда ірі халықаралық ғылыми-білім беру форумдарының өткізілуімен де дәлелденетінін айтты. Әр жылдары елімізде нейрохирургтардың Азия конгресі, Нейрохирургиялық қоғамдардың дүниежүзілік федерациясының (WFNS) білім беру курстары, Еуропалық нейрохирургиялық қоғамдар қауымдастығының (EANS) білім беру курстары, сондай-ақ Уолтер Э. Денди атындағы Нейрохирургиялық қауымдастықтың Дүниежүзілік конгресі ұйымдастырылды.
Қазақстандық нейрохирургияның жетістіктері мемлекет тарапынан денсаулық сақтау мен ғылымға көрсетілген тұрақты қолдаудың, сондай-ақ бірнеше буын мамандарының қажырлы еңбегінің нәтижесі.
Бүгінде қазақстандық нейрохирургтар әлемдік деңгейдегі күрделі операцияларды сәтті орындап, халықаралық ғылыми жобаларға қатысып, еліміздің атын беделді кәсіби алаңдарда танытып келеді.
Қазақстан нейрохирургтарының VI Конгресі еліміздің барлық өңірлерінен келген шамамен 200 маманды біріктірді. Форум аясында нейрохирургиялық ауруларды диагностикалау мен емдеудің заманауи әдістері, өңірлік нейрохирургияны дамыту перспективалары, жаңа технологияларды енгізу және кадр даярлау мәселелері талқылануда.